Samichlaussprüchli

1.

Ich bi en chline Stumpe,
tue gärn chli umegumpe,
ä Lumpeornig mache
mit mine viele Sache.

Tue mängsmol gar nid lose,
ha Fläcke a de Hose,
tue vielmol umestoh
statt weidli hei-zue goh.

Doch darfsch du s Mueti froge,
ich tue keis Tierli ploge.
Drum Chlaus bis so en Guete,
verschon mi vor de Ruete!

Bring doch nur gueti Sache,
wie tätsch du Freud mir mache!
Und gäll, säb weisch sit färn,
i ha mis Mueti gärn!

------------------------------------------

2.

Samichlaus ich hett en Wunsch
wänn du dänn zu öis hei chunsch
Wett ich mit dir use gaa
und ächli zum Esel stah
wett sin Chopf i'd Arme neh
und em ächli z'Ässe geh

-----------------------------------------------------------

3.

Was isch säb für es Liechtli?

Was isch säb für es Liechtli?
Was isch säb für en Schii?
de Chlaus mit de Latärne
lauft grad de Wald dur y.

Sin Esel, de hed glaade, er rüeft, J-a, J-a!
Hüt dörf i mit mim Meischter ämal is Stedtli ga!
Im Sack, da häts vill Nusse, au Tirggel, Zimmetschtärn,
die träg ich, wär's en Zentner,
für d'Chinde na so gärn!

------------------------------------------------------

4.

Arme Chlaus, wie häsch's du sträng!
gäll, dä Weg isch grüüsli lang,
zu de Chinde, zu de nette
wo so gern äs Päckli hetted!
Säg mer, langts ächt au für mi,
wänn ich ganz ä Liebi bi?

-----------------------------------------------------

5.

De Wald isch wiis und voller Schnee,
ich glaub, ich han de Chlaus grad gseh.
Mis Herzli chlopfed ganz fescht und gschwind,
gaht er no zu andere Chind?
Chum ine, liebe Samichlaus,
und lär Diin Sack grad us,
chumm, bliib doch no es Wiili i öisem warme Huus!

--------------------------------------------------------------------

6.

Ich bin än chliinä Pfüderi
das sägäd alli Lüüt
ich möcht so gärn än Grossä sii
doch streckä, das nützt nüt
gäll Samichlaus, das weisch du scho
chumm glich i öises Huus
und läär no vor äm Witergoo
dä Sack i'd Stubä us.

---------------------------------------------------------

7.

Samichlaus, du liebe Maa,
mues ich jetzt go füre staa?
Gäll, du bisch nöd bös mit mir,
weisch ich han ächli Angscht vor dir.

Gfolget hani scho nöd immer,
s'git no Sache, diä sind schlimmer!
Gäll, das wämmer jetzt vergässe,
lieber Schnitz und Bire ässe.

Gäll, ich dörf jetzt wieder gaa,
Samichlaus du liebe Maa.

--------------------------------------------------------

8.

Für vieles stellt mer hüt Roboter a,
mer seit ohni Computer chas nöd gah.
Es git Raggete und Satellite,
und doch wird uf de Erde immer no gschtritte.

Mer schafft vieles ab und tuet ume hetzte,
nur dich, Samichlaus, cha niemer ersetzte.
Du lasch dich nöd vom Moderne la leite,
und läbigi Schmutzli tüend dich begleite.

Ziesch all Jahr z'Fuess dur euses Land,
treisch immer s'rot und goldig Gwand,
für jedi Familie häsch Zit und machsch halt.
Ich danke dir im Name vo jung und alt.

-------------------------------------------------------

9.

Samichlaus, ich bi so froh,
dass du hütt zu mir bisch choo
Du weisch, ich tue gern Nüssli ässe:
häsch miis Säckli nöd vergässe?

------------------------------------------------

10.

Samichlaus i han e Frag:
säg, was machsch du jede Tag?
Flügsch im Summer au devo,
uf en Insle irgendwo?

 

Lisch mit Badhose am Strand,
hesch es Schoggiglacé i de Hand?
Gasch go fische mit dim Bart?
Machsch im Car e Stadtrundfahrt?

 

Oder blisch du doch lieber dihei,
i dim Wald so ganz elei?
Höcklisch gmüetli vor dim hus?
säg, ich lache dich nöd us!

>> zurück zur Anmeldung